Steikt lifur með beikoni
Lifur og beikon er klassísk samsetning og í þessari ensku uppskrift er líka kryddað með hvítlauk og worcestersósu.
- 4
![Pottur og diskur](https://islensktlambakjot.is/wp-content/uploads/2021/03/tomt.jpg)
Hráefni
600 g lambalifur
100 g beikon í sneiðum
2 msk hveiti
nýmalaður pipar
salt
1 msk smjör
1 msk olía
1 hvítlauksgeiri, saxaður smátt
1 msk worcestersósa
Leiðbeiningar
1
Lifrin hreinsuð og skorin í þunnar sneiðar á ská; best er að sneiðarnar séu vel innan við 1 cm á þykkt. Þykkbotna panna hituð og beikonið steikt þar til það er stökkt en þá er það tekið af pönnunni og látið renna af því á eldhúspappír. Beikonfeitinni hellt af pönnunni en smjör og olía hitað í staðinn. Lifrarsneiðunum velt upp úr hveiti krydduðu með pipar og salti og þær síðan steiktar við háan hita í 1-2 mínútur á hvorri hlið. Hvítlauk og worcestersósu bætt á pönnuna og steikt í 1 mínútu í viðbót en síðan eru beikonsneiðarnar settar ofan á og borið fram, t.d. með soðnum kartöflum.