Pottréttur úr lambahjörtum

Hjörtun fituhreinsuð og himnudregin og æðar skornar burt. Síðan eru þau skorin í litla bita (1-1½ cm á kant). Beikonsneiðarnar skornar í litla bita og steiktar í þykkbotna potti þar til fitan er runnin en síðan tekið upp með gataspaða. Hjörtun sett í pottinn og steikt í beikonfeitinni þar til þau eru vel brúnuð. Þá er beikonið sett aftur út í ásamt lárviðarlaufi, timjani, basilíku og pipar. Soði og víni hellt yfir og hitað að suðu. Hitinn lækkaður og látið malla við vægan hita í um 1½ klst. Fylgjast þarf með þegar líða tekur á suðutímann og bæta við soði eða vatni ef uppgufun verður of mikil. Smjörið brætt á pönnu og gulrætur, perlulaukur og sveppir látin krauma í því í nokkrar mínútur en síðan hellt í pottinn og hrært. Látið malla í 10-15 mínútur í viðbót. Strengjabaununum bætt út í, hitað að suðu og látið sjóða í nokkrar mínútur í viðbót, eða þar til baunirnar eru meyrar. Lárviðarlaufið fjarlægt. Hellt í skál og steinselju stráð yfir. Borið fram t.d. með tagliatelle eða hrísgrjónum.