Lambaskankar með paprikuhettu

Lambaskankarnir e.t.v. fitusnyrtir. Grillið í ofninum hitað og paprikurnar grillaðar þar til þær eru meyrar og hýðið farið að verða svart; snúið öðru hverju á meðan. Þær eru svo teknar út, stilkurinn fjarlægður og sem mest af fræjum með, og svo er botninn skorinn af þeim. Ofninn hitaður í 160 gráður. Á meðan paprikurnar grillast er beikon, hvítlaukur og rósmarín sett í matvinnsluvél eða blandara og saxað í mauk. Beittum hnífsoddi stungið í skankana á nokkrum stöðum og blöndunni núið inn í rifurnar. Kryddað með pipar og salti. Olían hituð á pönnu og skankarnir brúnaðir á öllum hliðum. Teknir af pönnunni en víni eða vatni hellt á hana, látið sjóða ögn niður og pönnubotninn skafinn vel á meðan. Fjórum álpappírsbútum, 25-30 cm á kant, raðað á vinnuborð og lauknum skipt á bútana. Soðinu af pönnunni hellt yfir og síðan er einn skanki settur á hvern bút og leggjarbeinið látið vita upp. Papriku smeygt upp á hvern skanka þannig að beinið standi út um gatið eftir stilkinn og álpappírinn brotinn utan um þannig að beinið eitt standi út úr pappírnum. Bögglarnir settir í eldfast fat og bakaðir í um 2 klst. Borið fram t.d. með kúskús eða soðnum hrísgrjónum.