Lambakjötspottréttur með apríkósum og sætum kartöflum

Veltið kjötinu upp úr hveiti, blönduðu með pipar og salti (gott að setja allt saman í plastpoka og hrista). Hitið olíuna í þykkbotna potti og brúnið kjötbitana vel á öllum hliðum við góðan hita; best er að brúna þá í nokkrum skömmtum, nema potturinn sé þeim mun stærri. Takið þá svo upp og geymið. Lækkið hitann svolítið, setjið lauk, sellerí og hvítlauk í pottinn og látið krauma í um 5 mínútur. Hrærið þá kryddinu saman við og látið krauma í 2-3 mínútur í viðbót. Setjið kjötið aftur í pottinn, bætið við lárviðarlaufi og apríkósum, ásamt svo miklu vatni að tæplega fljóti yfir. Hitið að suðu og látið malla við hægan hita undir loki í um 40 mínútur. Bætið þá sætu kartöflunum út í og látið malla í um 20 mínútur í viðbót. Smakkið sósuna og bragðbætið eftir þörfum; ef hún er mjög þunn má taka lokið af síðustu mínúturnar og hækka hitann til að sjóða hana niður. Skreytið e.t.v. með saxaðri steinselju.