Lambakjöts- og hrísgrjónapílaf

Þessi lambakjöts- og hrísgrjónaréttur, sem ættaður er frá Mið-Asíu, er kannski svolítið fyrirhafnarsamur en þó einfaldur um leið og fyrirhöfnin borgar sig alveg. Hrísgrjónin eru soðin með kjötinu en ekki borin fram sér.

table with empty plate, a knife and fork onto a napkin and a small bowl with salt in it

Hráefni

 6-800 g lambaframhryggur
 100 ml olía
 3 laukar, saxaðir
 1 tsk kummin, grófsteytt
 350 g hrísgrjón, helst basmatigrjón
 400 g gulrætur
 nýmalaður pipar
 salt
 0.75 l kjötsoð eða vatn (eða eftir þörfum)
 25 g möndlur, heilar

Leiðbeiningar

1

Kjötið bein- og fituhreinsað og skorið í fremur stóra bita. Olían hituð á stórri, þykkbotna pönnu eða í víðum potti og laukurinn látinn krauma í henni við meðalhita þar til hann er að byrja að brúnast. Kummini hrært saman við og látið krauma í 1-2 mínútur í viðbót en þá er lauknum ýtt út til hliðanna og kjötið brúnað við meðalhita á öllum hliðum. Lok sett á pottinn og kjötið látið krauma áfram við vægan hita í 10-15 mínútur; svolitlu vatni bætt út í ef þarf. Á meðan eru hrísgrjónin skoluð vel og sett í skál, köldu vatni hellt yfir og þau látin standa nokkra stund. Gulræturnar skafnar og skornar í eldspýtnasverar ræmur. Settar í pottinn og látnar krauma smástund en síðan er kjötið kryddað með pipar og salti, lok lagt yfir og látið krauma í um hálftíma; svolitlu vatni bætt við ef þarf svo ekki brenni við. Hrísgrjónunum hellt í sigti, látið renna vel af þeim, og þegar kjötið er orðið meyrt er þeim hrært saman við. Látið krauma í nokkrar mínútur og síðan er soðinu hellt yfir og látið sjóða við meðalhita í um 10 mínútur. Hitinn lækkaður, lok sett á pottinn og látið malla við mjög vægan hita í 15 mínútur í viðbót en síðan er potturinn tekinn af hitanum en lokið haft á honum og hann látinn standa óhreyfður í 10-15 mínútur. Á meðan eru möndlurnar ristaðar á þurri pönnu þar til þær eru rétt farnar að taka lit. Lokið tekið af pottinum, hrært gætilega í honum með gaffli, möndlum stráð yfir og borið fram.

Deila uppskrift

Share on facebook
Share on twitter
Share on pinterest

Þessi vefsíða notar vafrakökur til að bæta upplifun þína. Með því að halda áfram samþykkir þú stefnu okkar um vafrakökur.​