Lambahryggvöðvi að hætti Kokkalandsliðsins

Byrjið á að taka lambið úr kæli og látið það ná stofuhita fyrir eldun. Svo er unnið með kartöflu og hægeldað lamb, því næst sósuna og síðast er sjálft lambakjötið eldað.

Setjið lambabóg ásamt soði í þrýstipott og eldið í 50 mínútur, rífið kjötið af beininu og athugið að hér notum við eingöngu um fimmtung af kjötinu. Geymið afganginn og soðið úr pottinum í annað. Sjóðið þriðjung af soðinu niður um helming og blandið kjötinu fínt rifnu saman við ásamt sinnepsfræjum, skarlottulauk, sítrónuberki og smakkið til.

Pressið nýsoðnar kartöflur í gegnum sigti og blandið reyktu smjöri og kartöflumjöli saman við, blandið síðast eggjarauðum og salti við.

Smyrjið kartöflumauki í form sem henta sem einn skammtur hvert, t.d. siliconform, gerið holrými í hvert form og fyllið með rifnu lambi og lokið síðan með kartöflumauki. Eldið á 90 °C í 50 mín.

Brúnið lambafitu og sinar í ofni þar til verður gullinbrúnt. Steikið grænmeti í potti ásamt kryddi og brúnið vel. Bætið soðinu í og sjóðið niður um 1/3. Takið af hita, setjið steiktu fituna og sinar í pottinn og lokið. Ath að hella ekki aukafitunni í pottinn! Látið standa í 30 mín, sigtið og bætið við smjöri og smakkið til með salti í lokin.

Hreinsið fituna og sinina sem liggur undir af, fitan og sinin er nýtt í annars vegar stökka blöndu á lambið og hins vegar í sósuna. Saltið kjötið og brúnið vandlega á pönnu í olíu og smjri, setjið á bakka og eldið í ofni á 80°C í 25 mín, eða þar til hitastigið nær 58°C. Hvílið í 15 mínútur áður en þið setjið stökkt bóghveiti og lambafitu ofan á, skerið og berið fram.