Hvítlauks- og rósmarínkryddaðir lambaskankar með grænmeti

Þessi suður-evrópski lambakjötsréttur er bragðmikill og góður og hentar vel fyrir skanka eða annað kjöt sem þarf langa og hæga eldun. Grænmetið er eldað með kjötinu.

table with empty plate, a knife and fork onto a napkin and a small bowl with salt in it

Hráefni

 1 kg lambaskankar (leggir)
 4 msk ólífuolía
 2-3 rósmaríngreinar
 1 sítróna
 6 hvítlauksgeirar
 nýmalaður pipar
 salt
 150 ml rauðvín, soð eða vatn
 8-12 kartöflur
 3-4 gulrætur
 1 gulrófa

Leiðbeiningar

1

Ofninn hitaður í 225 gráður. Skankarnir þerraðir og umframfita e.t.v. skorin burtu. 2 msk af olíu dreift í nokkuð stórt, eldfast fat og skönkunum velt upp úr henni og þeir síðan kryddaðir með pipar og salti. Rósmaríngreinarnar skornar í búta, sítrónan skorin í þunnar sneiðar og hvítlauksgeirarnir afhýddir og marðir en ekki pressaðir eða saxaðir. Hluta af þessu dreift á botninn á eldfasta fatinu, skankarnir lagðir ofan á og afganginum af rósmaríninu, sítrónusneiðunum og hvítlauknum dreift yfir. Sett í ofninn. Eftir um 15 mínútur er hitinn lækkaður í 175 gráður og víni, soði eða vatni (ef notað er vatn er gott að bæta smáskvettu af rauðvínsediki út í) hellt í fatið. Steikt í 25 mínútur í viðbót og á meðan eru kartöflurnar afhýddar og skornar í helminga, nema þær séu mjög litlar. Gulræturnar afhýddar og skornar í 3-4 cm bita og gulrófan afhýdd og skorin í teninga, 4-5 cm á kant. Velt upp úr afganginum af olíunni, kryddað með pipar og salti og dreift í kringum skankana í eldfasta fatinu. Steikt áfram í 30-40 mínútur í viðbót, eða þar til grænmetið er meyrt. Borið fram í fatinu og óþykkt soðið haft með sem sósa.

Deila uppskrift

Share on facebook
Share on twitter
Share on pinterest

Þessi vefsíða notar vafrakökur til að bæta upplifun þína. Með því að halda áfram samþykkir þú stefnu okkar um vafrakökur.​