Grilluð lambahjörtu

með rauðrófugljáa & sölvum

Hráefni

Grilluð lambahjörtu
 4 lamba hjörtu
 1 hvítlauksgeiri, pressaður
 10 ml jómfrúar ólífuolía
 40 ml soja sósa
 5 g söl
Rauðrófugljái
 300 ml rauðrófusafi (hægt að versla tilbúinn)
 25 g birki síróp (má nota púðursykur í staðinn)
 10 ml epla edik
 10 ml fiskisósa
 30 g kalt smjör
 salt
Timían olía
 50 g ferskt íslenskt timían
 50 g sólblómaolía (eða önnur bragðlaus olía)
 Salt
Borið fram
 Rauðrófugljái
 10 g rifin piparrót
 10 g ferskar íslenskar jurtir að eigin vali
 10 gr ferskt íslenskt timían
 10 gr timían olía

Leiðbeiningar

1

Lambahjörtu eru sannarlega vanmetið hráefni sem getur verið hátíðarmatur við rétta meðhöndlun, hjörtu þarf annað hvort að elda mjög lengi, eða örstutt eins og hér er gert. Við leggjum til að fólk prófi sig áfram með þessa skemmtilegu uppskrift kokksins Gísla Matt frá Slippnum í Vestmannaeyjum, en rétturinn hefur m.a. ratað á borð í forsetaveislu á Bessastöðum og er í nýútkominni bók hans, Slippurinn.

Gísli Matt eldar hjörtun létt, helst á kolagrilli en pönnusteiking gengur líka vel upp. Bragðið af rauðrófum, piparrót, birki og íslenskum jurtum minna okkur svo á íslensk jól.

Grilluð lambahjörtu
2

Hreinsið fituna að mestu utan af hjörtunum, skerið frá u.þ.b. ½ cm af efsta hlutanum sem er seigur. Skerið hjörtun í helminga og hreinsið sinina sem liggur innan á þeim, skerið aftur til helminga svo hvert hjarta endi í fjórum bitum.

3

Hjörtun eru lögð í vökva úr soja sósu, með söxuðum sölvum, pressuðum hvítlauksgeira og ólífuolíu, látið marinerast þétt pökkuðu í a.m.k. í 6 klst.

4

Lambahjörtun eru grilluð á heitu grilli eða pönnu í um 1 mínútu á hvorri hlið, eiga að vera létt steikt, og gott er að krydda með smá svörtum pipar eftir eldun

5

Lambahjörtunum er síðan leyft að hvíla í 3-4 mínútur áður en þau eru borin fram. Það er skemmtilegt að hafa þau á prjónum eða trjágreinum (eins og á myndinni) en ekki nauðsynlegt.

Rauðrófugljái
6

Sjóðið rauðrófusafann niður um helming (50%). Bætið eplaediki, birkisírópi og fisksósu saman við. Takið af eldavélinni og pískið smjörinu saman við, smakkið til með salti og bætið við ediki ef vantar meiri sýru.

Timían olía
7

Grófhreinsið timían takið grófustu stilkana frá og setjið timían og olíu í jöfnum hlutföllum í matvinnsluvél og blandið á hæstu stillingu þar til olían nær 60°C eða u.þ.b. 10 mín. Ferlið og hitinn leysir bragð og lit úr jurtinni yfir í olíuna.

Sigtið í gegnum síudúk eða fínt stykki og smakkið til með salti í lokin.

Borið fram
8

Eftir eldun, penslið hjörtun duglega með rauðrófugljáa og setjið á diska, bætið rauðrófugljáa við á diskana og síðan olíunni. Skreytið með jurtum.

Deila uppskrift

Share on facebook
Share on twitter
Share on pinterest

Þessi vefsíða notar vafrakökur til að bæta upplifun þína. Með því að halda áfram samþykkir þú stefnu okkar um vafrakökur.​