Kartöflustappa með hvítlauk og steinselju

Ofninn hitaður í 200°C. Ysta hýðið tekið af hvítlauknum en geirarnir ekki losaðir í sundur. Laukurinn settur í litla, eldfasta skál eða búið til bolla úr álpappír. 2 msk. af ólífuolíu hellt yfir og salti stráð yfir laukinn. Bakaður í 25-30 mínútur, eða þar til laukurinn er meyr. Á meðan eru kartöflurnar afhýddar, skornar í fremur stóra bita og soðnar í saltvatni þar til þær eru meyrar. Vatninu hellt af þeim og þær látnar standa í opnum potti í 1-2 mínútur til að allur vökvi gufi upp. Hvítlauksgeirarnir losaðir í sundur og hver um sig kreistur úr hýðinu. Kartöflurnar eru síðan stappaðar með hvítlauknum og ólífuolíunni (líka olíunni sem hvítlaukurinn var bakaður í). Kryddað með pipar og salti eftir smekk og hrært rösklega með sleif. Steinseljan söxuð smátt og hrært saman við.